Love is...

Ngayong buwan ng Pag-ibig, pagnilayan natin ang salitang Love.

Isa sa mga pinakapaboritong berso sa Bibliya ay ang 1 Corinthians 13: “Love is patient, love is kind.  It does not envy, it does not boast, it is not proud.  It does not dishonor other, it is not self-seeking, it is not easily angered, it keeps no record of wrongs.  Love does not delight in evil but rejoices with the truth.  It always protects, always trusts, always hopes, always preserves.  Love never fails.”

Nang mabasa ko ito ay naintindihan ko ng lubusan kung bakit hindi ganon kadaling umibig at ibigay ang puso – dahil by nature ay selfish tayong mga tao.

Maraming tao ang takot magmahal matapos makipaghiwalay sa isang taong matagal nilang nakapiling.  May mga pusong napagod.  May mga nanghinayang.  At mayroong mga kailangan mamahinga dahil panibagong proseso na naman ang pagkilala, pakikisama at pagtanggap ang kailangang kaharapin.  Hindi madaling magmahal.  Pero sabi nga, ito ang greatest commandment, ang pinakauna sa lahat ng utos ng Diyos – ang mahalin ang ating kapwa, gaya ng pagmamahal Niya sa atin.

Sa konteskto ng Bibliya, ipinakikita na anumang gawain natin, kung hindi mula sa pagmamahal, ay walang silbi.  Ang pag-ibig ang espesyal na sangkap sa anumang gawain natin kung kaya’t ang ating mga angking talento at kakayanan ay nagagamit natin ng tama at matagumpay.  At bagamat tayo ay magkakaiba ng mga kakayanan, ang pagmamahal ang isang bagay na libre para sa lahat.

Love is patient.  Minsan ay irritable tayo at madalas magalit o mainis sa ibang tao kahit hindi nating lubusang maipaliwanag kung bakit.  Ito ay sa kadahilanang nais nating maging perpekto ang mga bagay-bagay palagi.  Ang ating mga plano na mangyari sa ating ayon, ang mga tao na umarte, gumalaw ayon sa ating nais, ang mga bagay na inaasam natin ay mapasaatin.  Ngunit ang reyalidad ay hindi tayo mga perpekto.  At dahil dito ay hindi maaaring magmula ang perpekto sa atin.  Ang Diyos ang bukod tanging perpekto at siya lamang ang maaaring gumawa ng perpekto.  

Ito ang kailangan nating maintindihan.  Kaya tayo madaling nagagalit ay dahil umaasa tayo sa isang bagay na kailanman ay hindi mangyayari sa ating mga tao.  Kailangan nating maalalang ang perfection ay sa Diyos lamang.  Kaya huwag magalit kung sa halip ng iyong paulit-ulit na pagtuturo sa isang tao ay hindi  niya makuha ang bagay ng gusto mo – dahil hindi siya Diyos na kayang gawin ng perpekto ang mga bagay.  Huwag mo ring asahan ang iyong katipan ang magiging lahat sa buhay mo dahil ang Diyos lamang ang lahat.  

Minsan talaga nasa pananaw at pag-iisip lamang natin iyan.  Kung iaayon lamang natin sa lugar ang ating inaasahan, madarama mong gagaan ang buhay mo at makikita mo ang tunay na diwa ng pagmamahal.  Huwag maghanap ng perfect match dahil hindi iyon mangyayari.  Ipagdasal mong dumating sa iyo ang taong makikilala mo at mamahalin mo ng perpekto sa halip ng kanyang mga kakulangan at kahinaan.