Semana Santa 2010

     Ngayong araw ng Linggo ay Palaspas na or "Palm Sunday". Hudyat na ito ng pagsisimula ng Mahal na Araw. Marami sa atin, imbes na mangilin ay nagbabakasyon at namamasyal sa kung saan-saan. Sa karamihan, ito lang kasi ang panahon na maaaring magsama-sama ang magkakaibigan at pamilya dahil walang pasok ang lahat. Siguradong puno na naman ang mga beach at resorts. Siksikan na naman sa Boracay. Ngayon pa lang, nagsisimula nang magplano ang magkakaibigan at pamilya kung saan ang kanilang destinasyon.

     Hindi na ganoon karami ang nagbibisita-Iglesia. Kakaunti na rin ang nakikibahagi sa Pabasa. Hindi naman kailangang hagupitin ang katawan ng latigo o magpapako sa krus. Nakaugalian na ito, ang pamamasyal sa panahon ng Semana Santa. Ang magsaya, uminom, pero huwag din sana natin kakalimutang magsakripisyo at mangilin. Alalahanin natin na ang diwa ng Mahal na Araw ay ukol kay Jesus na isinakripisyo ang kanyang buhay para sa ating mga kasalanan. Sana ay maisama n'yo Siya sa anumang inyong balak ngayong Semana Santa.